曼城追擊「陸軍」捧1.64倍客W

猪拉多纳

比歷連尼擅打心理戰

今時今日做教頭真係唔容易，除咗要教波叻、氹得掂一眾球星之外，仲要識得用唔同方法去刺激班球員落場搏命。好似曼城主帥比歷連尼咁，上仗就呃班球員話曼聯贏咗波，成功激勵班兵作客砌低韋斯咸。比帥咁擅長玩心理戰，相信「藍月亮」今晚歐聯作客近態頹爆嘅莫斯科中央陸軍有力再贏一場，一於撐1.64倍客W。

（有線61、64、201、203周四凌晨0:00直播）
中央陸軍連食5場白果

全賴擅打心理戰嘅領隊比歷連尼出怪招，曼城先至攞到今季英超首場作客勝仗，今次佢哋山長水遠作客去到俄羅斯，相信比帥又會諗計力求繼續贏波攞威。上仗省入兩粒嘅射手阿古路，無論拍住尼格度定迪斯高攻堅都例有貨交，配合中場大衞施華同耶耶托尼嘅支援，足以攻破對方大門。今仗「藍月亮」預料有右閘薩巴列達重任正選，更有助減低中堅高柏尼缺陣嘅影響。

對手莫斯科中央陸軍近況差到嚇死人，佢哋近5場聯賽只得1和4負，仲要場場都食白果明顯陷入低潮。而且中場大將迪沙高耶夫、亞歷辛達斯、守將馬里奧費南迪斯倦勤，實力大打折扣，今場睇怕主場都難逃一敗。
歐聯D組