勝利遜晒「獅」家路受讓筍

猪拉多纳

有料教頭告別戰

今日澳職獨腳戲，墨爾本勝利主場迎戰布里斯班獅吼，勝利教頭普斯迪高路日前落實接掌澳洲國家隊，今場作為告別戰，咁啱遇着當年由自己親手打造嘅獅吼，連同効力獅吼多年嘅尼高斯首度倒戈，將帥都咁熟呢條「獅」家路，+1「讓主」確係抵夾筍！

（有線64周五下午4:30直播）
上季對賽勝利不敗

普斯迪高路執教墨爾本勝利前，喺獅吼度過兩年半時間，期間連奪2011及2012年總冠軍，無論攞過金靴獎嘅貝利沙抑或中場指揮官布萊治，當時都係聽佢支笛。其後普斯迪高路過檔勝利，獅吼唔單止霸氣蕩然無存，更被普帥睇通晒條路，上季兩循環都握手言和收場，今日再遇分分鐘又有驚喜。

仲有，勝利家陣進攻中場嘅尼高斯，今夏過檔勝利前喺獅吼度過6個年頭，深諳獅吼踢法，如今掉轉槍頭首度倒戈落場，對於點樣撕破舊東家防線，肯定有唔少心得啦！
獅吼首席射手打柴

對手布里斯班獅吼雖然頭兩輪聯賽贏晒係威係勢，但今場被舊教頭舊隊友睇通睇透，唔慌惡得出樣之餘，連續兩季成為獅吼首席射手嘅貝利沙更證實腿筋受傷避戰，前線缺少呢名重磅人物，就算勝利後衞柏保路干查拉斯今場坐波監，睇怕佢哋都未必佔到咩甜頭。