香川定贊奴沙？考起莫耶斯

猪拉多纳

選擇題一，贊奴沙定香川真司？選擇題二，尹佩斯定朗尼？曼聯主帥莫耶斯民望低，做每個決定前都要小心翼翼，佢喺歐聯用「香川+朗尼」組合效果超好，朗尼打前激搶鏡，大軍今晚返英超主場對史篤城，莫帥若變陣出事又成箭靶。不過，曼聯極需一場大勝振奮士氣，呢次鬥弱旅係餐士面，正路可大勝，要「讓球主勝」！

曼聯喺歐聯對皇蘇憑對手擺烏龍贏1比0，走地追大盤嘅朋友梗係躁啦，不過，相比起上周聯賽對修咸頓贏住笠水換人入嚟守嘅情況，「紅魔鬼」今次起碼攻足全場，特別係換邊後起碼有四至五個黃金機會，若然把握得好啲，贏三、四粒絕不為奇。曼聯上場重用香川真司造波效果理想，佢要同紅爆小將贊奴沙正面爭位，一個回勇，一個當紅，真係唔易揀。

朗尼上場喺尹佩斯缺陣下真正打正箭頭，踢出今季個人代表作，佢全場瘋狂起腳射門，係就係獨食咗啲，但真係好有威脅。尹佩斯傷勢已無大礙，如無意外可復出，大軍中前場多人到用唔晒，教頭莫耶斯面對艱難選擇題，若然有乜閃失，實畀人鬧爆，好在今場對手只係弱旅史篤城，莫帥無論用乜人腳，只要班兵生生性性，贏波唔成問題。
曼聯炒得起殘陣史篤城

史篤城中堅梳爾哥斯係曼聯青訓產品，呢個殺人王因病休戰，加上另一硬淨後衞占士甘馬倫都有機會缺陣，防守力起碼打八折。最大鑊係史篤城近年對曼聯例牌冇運行，過去十戰「紅魔鬼」輸九場，升班後五次造訪奧脫福輸晒，其中四場輸兩粒或以上，曼聯有力食「私房菜」！