拜仁金鑽數據冚死哈化

猪拉多纳

德甲班霸拜仁慕尼黑主場對哈化柏林，拜仁無論實力、狀態同往績都佔壓倒性優勢，揸住金鑽數據同你踢，一於盡炒唔留手，「讓球主客和」拜仁讓到兩球都唔多，黑柴撐1.85倍「讓球主勝」。

拜仁近期着火程度令人震驚，上輪聯賽只係下半場發力，就輕鬆反勝緬恩斯4比1，周中歐聯主場面對捷克冠軍柏辛域陀尼亞更加一面倒，根據歐洲足協官網統計，全場射門次數35對0，拜仁控球指數達到77%，全面控制戰局，對手完全冇偷雞機會，下半場中段已經收起「國王」列貝利同隊長拿姆，輕鬆到暈。
洛賓列貝利紐亞哈化剋星

拜仁近4次對哈化全勝，轟入18球只失3球，陣中三大主力都係哈化剋星，洛賓近3次對哈化個人共入6球，列貝利近兩次對哈化亦交出6次助攻，至於門將紐亞，計埋先後効力史浩克同拜仁，總共對過哈化9次只失1球，而呢個唯一失球仲係12碼添！

哈化今季回升德甲，質素始終有限，而且作客奇曳，今季計埋德甲同德國盃6場作客未贏過，尤其德國盃首圈面第4級別嘅紐曼斯特都無法喺法定時間解決對手，次圈遇上德乙嘅凱沙羅頓仲要輸波出局，佢哋上次對拜仁主場都要吞6蛋，今晚都好難幸免。