地頭龍慕遜再施「法」術

猪拉多纳

慕遜加柏今季成績唔錯，主場更可以用「恐怖」嚟形容，今晚佢哋喺德甲迎戰近4場聯賽不勝嘅法蘭克福，大有機會延續100%嘅主勝率，1.82倍主勝值得捧場。

（有線61、64、201、203周一凌晨0:30直播）
法蘭克福踢到腳軟

慕遜今季聯賽贏過4場波，全部都喺主場取得，強如多蒙特都要吞佢哋兩隻蛋，麥斯古斯同拉菲爾基達奴等新兵表現對辦，係球隊戰鬥力大增嘅原因之一，門將達史特根盛傳下季過巴塞隆拿，中場靴爾文又話得到阿仙奴垂青，證明呢隊波嘅實力已經得到廣泛肯定，睇番佢哋今季4場主場贏晒之餘，每場至少都贏對手2粒，今仗開W易過借火啦！

法蘭克福近5場聯賽未輸過，但對上4場其實全部和波，表現唔係真係咁有說服力，而且佢哋依家仲有真羅辛度、施巴斯坦洛迪等傷兵，周中又啃完歐霸盃賽事，對於人腳唔充裕嘅法蘭克福嚟講都幾惡頂，今場作客睇怕都頂唔住。仲有樣嘢提大家，由今晚開始歐洲轉冬令時間，睇波記得推後一個鐘，同埋着多件衫唔好冷親呀！
頂占筍盤：慕遜加柏（主勝）