基達菲弗爆「畢」勝無歸

猪拉多纳

兩大奇兵合演西甲獨腳戲

今輪西甲壓軸戲碼，由今季兩支奇兵基達菲與畢爾包擔綱出演。基達菲成功走出季初低潮，目前更勢如破竹締造聯賽4連勝佳績，今晚佢哋喺主場迎戰作客蟲畢爾包，吼實基達菲個1.93倍平手盤，可謂坐和望贏。

（開賽時間：周二清晨5:00）

基達菲喺呢個月突然大爆發，4連勝之餘仲豪取9球僅失1球，話畀大家知咩叫做攻守兼備，認真犀利！其中分別貢獻3球嘅阿祖安哥倫加同埋柏度李安，今晚會繼續落場數胡，基達菲鋒力夠晒保證啦！
畢爾包進攻核心未Ready

仲有呀，近期演出相當Sharp醒嘅進攻中場沙拉比亞，日前仲畀會長安祖托利斯盛讚，話佢嘅實力拍得住皇馬新星艾斯高，沙拉比亞得嗰21歲仔，聽到有猛人讚當然開心啦，仲豪言要用入波及助攻去報答對方讚賞添！雖然中後場件阿歷西斯啱啱傷愈，今晚未必會落場，但基達菲其餘戰將全部都踢得，陣容尚算完整、鬥志高昂絕對抵撐。

另邊廂，畢爾包喺上輪砌低維拉利爾後，頭5輪主場4勝1和締造球會近21年嚟最佳開局，可惜呢支巴斯克球隊仍然貫徹「作客蟲」本色，計埋月初淨吞下游分子CF格蘭納達兩蛋，家陣佢哋作客共錄得3連敗劣績，過往9次造訪基達菲仲只得5和4負，點捧呀？

最大鑊係畢爾包仲有件前鋒安歷基蘇拿受傷缺陣、阿度里斯啞火、蒙尼恩續約又陷於僵局，幾名進攻核心「身心狀態」都未Ready，邊有贏波本錢？