「板櫈兵團」做主角

猪拉多纳

阿仙奴車路士副選爭細盃

英聯盃16強上演戲碼超強嘅倫敦打吡，阿仙奴主場對車路士，但千祈唔好諗住打吡戰就會踢到好激，因為英聯盃不嬲對啲豪門嚟講係雞肋賽事，而且兩軍近期喺英超同歐聯都惡戰連場，陣中主力都踢到疲態畢露，預計兩隊都會喺今仗會玩輪換，畀一班「板櫈兵團」落場戥吓腳。喺雙方都冇乜入球保證下，捧入球細比較啱數。

（TVB 01及now 801周三凌晨3時45分直播）
雲格講明 畀主力休息

英聯盃一向都不被強隊重視，往往係畀正選休息同副選登場嘅好時機。阿仙奴自93年贏咗聯賽盃之後就再無贏過，上季喺8強恥辱性輸畀乙組仔巴拉福特，上圈對西布朗都要去到射12碼階段先可以晉級，就知隊波一啲都唔重視呢隻盃仔，愛玩幼齒嘅領隊雲格更會將呢項盃賽當係練兵嘅好場所，今仗賽前佢更表明會玩輪換，畀一班攰爆嘅正選回一回氣。

的而且確，阿仙奴連場硬仗，主力疲態盡現，上周中輸畀多蒙特已響起警號，連大大隻嘅中鋒基奧特都親口話佢好需要休息，上場英超對住榜尾球隊水晶宮亦係因為班正選太攰而老鼠拉龜，最尾要靠12碼先開紀錄，而且球隊本周末會對利物浦，係拉開榜首優勢嘅關鍵一戰，今仗實在諗唔到理由班球員會搏命踢呢場波，相信都係會穩守為主。
莫帥作風 作客唔搶攻

同樣地，車路士一樣咁攰，球隊兩日前先鬥曼城一戰，班主力搏足全場到最後一刻至贏波，而且踢完呢場聯賽盃兩日後又要北上作客紐卡素，權衡輕重下，梗係英超緊要過聯賽盃，雖然莫連奴口口聲聲話出正選爭晉級，但佢早有出口術嘅前科，未必信得過，估佢臨場都係會派副選出戰，不過車路士人腳鼎盛，星級後備桑馬達、韋利安、伊度奧等攻擊手根本係正選級數，只係莫連奴一向鐘意打穩守突擊，唔會主動搶功，而且今仗係作客，踢法會趨向保守，計來計去都係捧細最正路。