曼聯平息圖案風波飲得杯「諾」

猪拉多纳

今晚英格蘭聯賽盃16強，有曼聯主場迎戰諾域治，紅魔今季喺英超戰績非常一般，想爭標就要靠盃賽喇！就算今晚佢哋只係半力出擊，但條鋒線依然有查維亞靴南迪斯孭飛，對住實力麻麻嘅諾域治有一定把握大捷，直取1.8倍「讓主」啦！

（TVB13及now818台周三凌晨3:45直播）
小豌豆孭飛狂攻諾域治

老實講，曼聯自從改由莫耶斯執教後，真係場內場外都搞到一鑊粥。先講場外吖，早排佢哋寄畀球迷嘅會訊，懶得意咁將MUFC四隻字砌成圖案，點知砌咗個勁似納粹黨嘅標誌，畀人插到暈，好彩，班高層都仲好識做，尋日就派咗傳媒總監出嚟道歉，總算平息咗呢單嘢。場內點衰就唔使多介紹喇，聯賽9戰得4勝，相信「魔躉」們都唔會奢望愛隊可以蟬聯英超冠軍，反而本土盃賽就仲有得諗嘅！事關佢哋上圈英聯盃擊敗利物浦晉級，當時射入唯一入球、上仗聯賽又射入奠勝球嘅查維亞靴南迪斯，今仗好可能正選披甲，同超新星贊奴沙拍住上整番幾粒顯身價，分分鐘踢得好過班正選添呀！

對家諾域治狀態仲衰過曼聯，近7戰得1勝之餘，對上兩場英聯盃賽事，即使係面對次級對手屈福特同埋貝利，夾埋都失咗5球咁多，反映佢哋條防線唔多穩陣，至弊係陣中冇一個前鋒可以擔起主力射手嘅位置，雲禾夫斯雲高更只得開咧戰有進帳，今晚對住曼聯都係輸少當贏啦。