英超班費增盃仔都唔放過

猪拉多纳

前日同大家分析過意甲，今日轉口味同大家講講英聯盃。過往呢項盃賽通常唔多受到英超球會重視，經常都會起用年輕球員孭飛，不過今時唔同往日，近年各支球隊班費都大幅增加，所有領隊都想爭盃向老闆交代，依家賽事嚟到16強，肯定激戰連場，其中阿仙奴對車路士之戰更係萬勿錯過。
唔再係預備組踏腳石

「兵工廠」自英超開鑼戰不敵阿士東維拉後，一度創出12場不敗佳績，直至上周中歐聯先輸番場畀多蒙特，只係話咁快佢哋又喺英超砌低水晶宮重返勝軌。家陣呢班波狀態同氣勢都一流，領隊雲格為咗結束8季冇盃捧走勢，肯定唔會放軟手腳，就算唔派「夫添」，陣容點都會有個譜。

當然，論狀態車路士其實唔差得過阿仙奴，佢哋啱啱喺聯賽仲砌低埋曼城，睇得出班波喺莫連奴帶領下，已經重現頂級強隊本色。不過講到底，我都係稍為睇好阿仙奴多啲，因為佢哋有主場之利，兼且休息時間比車路士多一日，體力佔優隨時係兩隊嘅勝負分野。