都靈明珠條件一流

猪拉多纳

　　有時馬房出馬數目多，未必代表全日大手去馬，你估真係人多好辦事咩。呢個論點已唔多合時宜。試諗吓大馬房養馬60匹有多，每次出馬梗有番咁上下數量，唔通1隻起、兩隻止。講到尾，賽馬係以馬匹為本，實力強弱先係最重要因素。

　　第四場四班1800米泥地。「齊大勝」睇個勢唔似等降班，如果唔係，上場可以志在參與，唔使咁搏，睇見小楊走位好精警，輸畀隻DAVID（「大衛金剛」），真係唔知講乜好，但亦知道隻馬泥地實力幾得。

　　齊大勝氣量足夠

　　「齊大勝」今次加程至1800米，一定會比一哩好，因為佢在外國跑到2000米以上，仲上到名，氣量唔使擔心，交得出比上場更強威力的話，可期補中。

　　第五場三班1200米泥地。「都靈明珠」隔咗個暑假，隻馬唔同晒？定係轉跑泥地識飛，我唔肯定係邊個理由，總之，今次冇轉到路程，騎師又係杜利萊，好運排埋1檔，計條件，比起上場仲要穩健，唔怕賠率熱，獨贏得廿幾蚊貨仔嘅話，屬全晚鋼膽。

　　御綵上仗露鋒芒

　　第七場二班1000米草地。「御綵」上仗初出露光，閃閃身走入一席第四名，輸個幾身位畀頭馬「旅英駿駒」咋，以阿棟記憶所及，方仔啲自購馬好少一出即跑得好，像早前「舖舖順」甚為罕見，所以，「御綵」應該都有唔錯嘅前景，呢次唔跑谷草轉田草，可以再睇多啲到底佢有幾叻。

    （陳華棟 資深評馬人）