曼城打鵲砰焦!砰焦!

猪拉多纳

超班二線兵夠贏有凸

英聯盃今晚續演16強賽事，而焦點之戰必屬「城門」失陷嘅曼城作客鬥「喜鵲」紐卡素，曼城門將赫特上仗英超發波瘟，連累球隊輸波，激嬲領隊比歷連尼，已計劃換「門」，今仗將改派「盃賽門神」彭迪利蒙把關，聯同尼格度、祖維迪、捷西斯拿華斯等星級後備，齊齊上足彈藥打「鵲」，以證明身價。以紐卡素呢條豆腐防線，相信難頂曼城億萬大軍來襲，客Ｗ1.62倍夠穩陣。

（now 818及TVB13周四凌晨3時45分直播）
比帥要交代 盃仔照搶

曼城上仗對車仔表現其實並唔差，只係臨完場赫特犯下低級錯誤致敗，實在唔抵，比歷連尼今仗將會雪藏佢以示懲戒，另亦安撫其他球員，顯示自己係一位賞罰分明嘅主帥。曼城痛失3分後，聯賽爭標唔樂觀，急於向中東老闆文梳亞交代嘅比歷連尼，更加唔會放過盃賽，爭勝決心有保證。

雖然比歷連尼亦好大機會作出輪換，但尼格度、祖維迪、捷西斯拿華斯、迪斯高、占士米拿等「二線兵」全部質素超班，佢哋有實力、有鬥心，一定把握每次上陣機會表現自己，希望爭正選，隨時比常規正選更落力。就以上圈英聯盃對韋根為例，祖維迪梅開二度，捷西斯拿華斯亦有波入，助球隊大勝5比0，毫不錫力，曼城輪換以呢班養精蓄銳嘅猛將擔正，效果更佳。
紐卡素防線曳 任射唔嬲

紐卡素中前場人腳唔錯，但後防太曳，高洛仙尼受傷後，中堅米克威廉臣搵唔到一位好拍檔，甚至要左閘出身嘅杜密特客串中路。呢條次貨防線，上仗對英超包尾嘅新特蘭都守唔住，對住曼城一眾進攻好手，肯定任射唔嬲，搞不好大敗一場，所以揀客W之餘，不妨考慮埋入球大。