銀河艦隊轟爆西維爾

猪拉多纳

打吡輸波谷氣「-2」照讓得起

喺上周末國家打吡慘被屈走2個12碼，輸畀巴塞谷埋一肚火嘅皇馬，今晚返番自己地頭巴拿貝球場，仲唔係開猛火攞彩好時機？咁啱得咁蹺，「銀河艦隊」今仗對手西維爾，可以話係佢哋「御用出氣袋」，對上9次交手就贏足8次，況且西維爾一向不擅作客，已經累積跨季聯賽21場不勝，今晚都係等做炮灰，皇馬讓2球，力奇照捧2.32倍「讓主」！

（now632台周四清晨5:00直播）

皇馬其實近況唔曳，輸畀巴塞之前喺歐聯加西甲夾埋攞到4連勝。只係上周末作客魯營，唔知係咪球證承受壓力都唔細，有2個問題12碼冇判，巴塞禁區內疑似犯手球，加上C朗喺禁區被侵犯，球證都睇唔到，否則最終場波邊個贏都唔知。
落後巴塞6分不容有失

睇番目前形勢，皇馬10戰得22分排喺西甲第3位，落後榜首巴塞6分同次席馬體會5分，仲想爭標不容有失。復咗操嘅中場重心沙比阿朗素雖然踢得，但多數只會喺下半場玩一陣，好在其餘主力都可以悉數披甲，包括C朗、艾斯高都係世界級射手，仲有個「左腳王」加里夫巴利肯定正選搏殺，只要佢哋生生性性，主場贏你三幾球有幾難？
西維爾殘陣作客曳

另邊廂，西維爾雖然近排踢出7場不敗走勢，不過睇番對手，唯一有級數都只係皇家蘇斯達，根本唔係咩值得驕傲嘅戰績。始終呢班波中場發電機馬高馬連近期養傷當中，進攻中場拿傑迪錫又話鼠蹊有傷，今晚只係紮住上，再睇埋佢哋守將法斯奧與中場麥比亞都齊齊倦勤，陣容不整憑乜搶分。

最恐怖係，力奇睇番佢哋聯賽作客成績，跨季作客21場未贏過，今季聯賽客場都係5戰得3和2負，一離開地頭就唔識踢波，今鋪真係隨時畀皇馬炒到阿媽都唔認得！
Data King 皇馬恰慣西維爾

‧皇馬近9次對西維爾贏出8次。

‧西維爾連續21場聯賽作客未贏過。

‧皇馬今季主場各項賽事7戰6勝，C朗5場有波入。
乜都玩錦囊 C朗少首球博艾斯高

皇馬谷埋一肚火，主場出擊相信好快入到波，揀首名入球者都係向佢哋球員埋手。雖則話C朗射術好，但佢今季8個聯賽入波只得1球係「首球」，賠率又唔好分，反而可以諗諗今季都有4個入波嘅艾斯高，或者打正箭頭嘅賓施馬。