流浪者穩守恰到阿聯

猪拉多纳

今日澳職又會見到前傑志教練甘巴爾嘅身影，佢率領阿德萊德聯作客西悉尼流浪者，「阿聯」進行西班牙化之後，踢法「好睇、唔好食」，上仗鬥防守硬朗嘅中岸水手，即刻現形，進攻無從入手，仲被對方「一劍封喉」。流浪者都係崇尚穩守突擊，隨時又格食格剋死阿德萊德聯，捧主勝。

（有線64台周五下午4時30分直播）
阿德萊德聯改踢法未執掂

甘巴爾將「巴塞式」足球移植入阿德萊德聯，理論上係好事，問題係陣中球員質素有限，只能表現出半桶水。頭兩仗主場對實力一般嘅珀斯光輝、墨爾本勝利，仲可以過到骨，但上仗遇到上屆總冠軍中岸水手，即刻冇運行，攻勢只係隔靴搔癢。開賽兩分鐘落後，仲有近90分鐘都追唔返。

西悉尼流浪者係上季常規賽冠軍，亦打入季後賽決賽，實力同水手不相伯仲，雙方踢法亦相似。相信教練普波域睇完「阿聯」上仗比賽後，已經知道點對付呢支「澳職巴塞」。流浪者另一個優勢係上仗打吡戰擊敗FC悉尼，打開今季勝利之門，日本名將小野伸二有波入，士氣返晒嚟，正好食住個勢痛擊攻守都未執掂嘅阿德萊德聯。