騎呢突襲 問你點頂？

猪拉多纳

今個星期守門員成為大家討論熱話，曼城門神赫特發神經亂咁撲出禁區，最後搞到被費托射入絕殺。其實成日都話守門員於場上每一秒都要保持集中，因為一個不小心就有機會賠上勝利，尤其幾位機會主義型前鋒最鍾意把握對方門將犯錯一刻化成入球，好似迪科爾、阿古路和亨利，都曾經試過趁門將未為意，從後偷走個波再射入空門。你做球迷見到個守門員好似我Lulu咁傻更更時，除咗苦笑都冇嘢好講啦！

如果係被偷襲都話可以怪自己，但係畀人不道德咁偷襲又會點呢？話說喺諾域治對卡迪夫城嘅比賽，踢到93分鐘仲係0比0，當時諾域治嘅堤迪傷咗，對手非常有道德咁踢出邊線，讓堤迪可以治療。然後比賽重新開始，一般嚟講，諾域治禮貌上係會將界外球畀番對手，但係隊友掟畀利萊費亞，佢竟然直接射入卡迪夫城無人看守嘅空門，可惡也！

諾域治呢種違反職業道德嘅突襲，唔止卡迪夫城球員不滿，連球證鍾斯都判罰入球無效，最終0比0完場！呢種突襲，就算贏咗場波都輸咗體育精神，何必呢。聽晚《球分》再同大家講多啲「突襲」嘅有趣資料啦！

（now 101周五晚10時30分直播）
托弗哨牙蘇聽晚爆「廠」

今個星期蘇亞雷斯領軍嘅利物浦要作客酋長球場出戰阿仙奴，雖然「哨牙蘇」都畀大家話過冇體育精神，但自從佢復出之後就入波停不了，依家所有紅軍粉絲都當佢係寶，仲點會有人怪佢呢？相反阿仙奴近況開始回落，主場兩連敗，要守住弗到暈嘅「2S」組合，連我呢個超級廠迷都唔太睇好，大家到時一定要支持呢場雙紅會呀！

（now 621周日凌晨1時30分直播）