巴塞炒格[-2]都愛

猪拉多纳

沙維「小白」尼馬復出 美斯破入球荒靠食「私房菜」

今晚西甲爆發「巴塞打吡」，榜首嘅巴塞隆拿會喺魯營恭候愛斯賓奴。「地上最強」禮拜二凌晨輕裝上陣都照炒切爾達3蛋，一班主力球星好似沙維、「小白」恩尼斯達同尼馬等今晚會悉數復任正選，最重要係美斯已經連續3場西甲冇波入，對住愛斯賓奴呢道「私房菜」係時候要交功課，足智彩開出巴塞「-2」，一於照捧1.75倍「讓主」。

（now632台周六凌晨4:00直播）

兩年嚟首次連續3場聯賽「食白果」，「球王」美斯條氣肯定唔順，好在往績上佢專恰愛斯賓奴，雙方對上兩次喺魯營交手，美斯就總共入咗5球，下周四凌晨巴塞就會喺歐聯火併AC米蘭，美斯當然想打破入球荒壯行色。
要贏波壯歐聯撼AC行色

巴塞上星期揚威「國家打吡」，教練馬天奴喺禮拜二凌晨場聯賽即刻畀班球星抖抖，但都照炒切爾達3:0，證明班波係幾咁Fit，同時預計嗰場波休戰嘅馬斯真蘭奴、碧基、沙維同尼馬會統統復出，恩尼斯達亦會復任正選。
近4次交手愛斯賓奴輸晒

雖然話巴塞守將艾迪安奴因為左腳大腿有傷唔出得，加上佐迪艾巴仲養緊傷，馬天奴今晚焗住用小將馬田蒙度亞出任正選左閘，但愛斯賓奴最近兩輪聯賽入得兩粒，鋒將祖安哥度巴又話腳部肌肉受傷缺陣，靠沙治奧加西亞同比科馬兩件「二打六」射手想搵巴塞着數？難啲喎！睇番往績，巴塞對上4次主場鬥愛斯賓奴都贏晒，當中近兩次仲分別派4蛋添，相信今場波嘅結果都唔會有太大出入咯！
Data King 愛斯賓奴作客半場例「守齋」

‧愛斯賓奴近5仗大細單跳。

‧巴塞近2次主場鬥愛斯賓奴都贏4:0。

‧愛斯賓奴今季5場西甲作客都未能於上半場入波。
乜都玩錦囊 半場波膽吼巴塞小勝

愛斯賓奴鋒力曳，今季5場西甲作客都未曾試過喺上半場入波，考慮到巴塞新季表現偏向慢熱，對上7仗嘅上半場好少大開殺戒，半場波膽吼3.4倍嘅1:0同4.55倍嘅2:0好路。