瘋狂賀芬咸大膽攻仁

猪拉多纳

德甲早場直播賀芬咸主場對拜仁慕尼黑，賀芬咸係德甲最瘋狂球隊，無論對任何對手都堅持有前冇後打死罷就，面對着晒火嘅班霸拜仁慕尼黑注定係一場入球騷，大細中位數調整到3.5球，喺黑柴眼中都係濕濕碎，照捧1.93倍大盤。

賀芬咸上季尾絕境逢生，全攻型教頭基斯度居功至偉，呢位瘋狂教練今季變本加厲，貫徹佢嘅主攻踢法，至今德甲踢咗10輪，佢哋嘅10場賽事全數開大，共入25球失23球，無論得球同失球，都係全德甲最多，佢哋今季聯賽平均每場有4.8個入球，球隊啱啱喺上輪作客大炒漢諾威4比1，氣勢如虹，黑柴相信今晚對住拜仁都唔會縮。
拜仁前線着晒火

另一邊廂，拜仁近況勇得交關，前線更加着晒火，近3場正式賽事合共轟入12球，真係勒都勒唔住，成班球員要幫「國王」列貝利爭金球獎，當然會加多兩錢肉緊，但上仗主場都畀哈化偷雞入咗兩球，防線應付死球同角球老問題始終未解決，面對擁有死球專家沙利荷域嘅賀芬咸難保不失，今場係對攻格局，入球唔會少。