曼城至叻打「雀」局

猪拉多纳

主場威力勁 阿古路Fit爆

今晚億萬大軍曼城將會喺主場迎戰「金絲雀」諾域治。兩隊波實力差距好大，曼城喺9場聯賽取得16分，暫時排喺積分榜第7位，客隊諾域治嘅得分正正係曼城嘅一半，只得8分，暫時排喺尾3。始終論實力，曼城完全係高出幾班波，尤其佢哋有主場之利，絕對炒得起對手。曼城讓一球，小妹心水推介1.49倍「讓球主勝」！

（now622台周六晚11:00直播）

「藍月亮」上場聯賽作客以1:2輸咗畀車路士，痛失3分，輸波罪人門將赫特因為同後防隊友拿斯達錫發生誤會，搞到出現空門，畀王子費托射入兼喺英超開齋，赫特呢鋪認真失禮。睇番周中嘅英聯盃16強，曼城加時以2:0贏紐卡素，領隊比歷連尼已經頂唔順，改用彭迪利蒙代替赫特打正選，果然呢位羅馬尼亞門神就把握到呢次難得機會，救出幾個險球，贏得比帥認同。相比起赫特之前對車仔嘅蝦碌，彭迪利蒙連續兩場聯賽盃保持清白之身，明顯係畀到人更大信心，難怪比帥上仗賽後就話會慎重諗諗係咪畀番個正選位赫特，小妹相信「彭仔」今晚都會為曼城把守獨木關。
諾域治近10場作客輸6場

防守執好，前線再冇後顧之憂，自然會有好發揮。事實上，佢哋班波得分點非常之多，阿根廷國腳阿古路今季Fit到漏油，開季至今已有10個「士哥」！更重要係，耶耶托尼、尼格度同埋迪斯高都好射得，分別有6球、4球同3球進帳。有啲咁勁嘅攻擊球員曼城嘅主場威力自然非常強勁，近10場主場比賽有8勝2負成績，仲有25球進帳添。

另邊廂，「金絲雀」近況認真麻麻，啱啱喺周中嘅英聯盃慘吞曼聯四蛋。就算上場聯賽對住同佢哋實力咁上下嘅卡迪夫城，都只能夠打和收場，真係信唔過o架。況且佢哋嘅作客表現好鬼曳，近10場作客只得1勝3和6負，失波仲多過入波。睇埋兩隊對碰往績，近6次曼城主場對諾域治，有4勝1和1負成績，佔盡優勢。無論實力、近況同對碰往績，曼城都高幾班波，所以今晚小妹撐硬曼城「讓主」！