華歷簡奴防線穿窿 皇馬未炒夠吼「大」

猪拉多纳

今晚西甲華歷簡奴會喺主場迎戰皇家馬德里，主隊最近打回原形連輸兩場，仲足足失咗6粒添，咁嘅豆腐防線又點頂得住有加里夫巴利同C朗領銜鋒線嘅皇馬先？「銀河艦隊」隨時繼周中大炒西維爾之後再開多鑊「其他」都似，捧中位數3.5球嘅1.8倍大，食住花生睇入波！

（now632台周日凌晨3:00直播）
主隊11場勁失27球

華歷簡奴早排揚威榜尾大戰砌低艾美利亞，諗住好醒啦，殊不知轉頭就分別以0:3同1:3輸畀華拉度列同奧沙辛拿，11輪聯賽勁失27球，連馬拉加同西維爾都可以數佢哋4、5粒，可想而知華歷簡奴條防線係幾咁弱雞！

畀巴塞守將丹尼爾通大細條片網上瘋傳，球隊又喺「國家打吡」輸波，咩面都冇晒嘅C朗火都嚟埋，上仗就毫不留情咁大演帽子戲法，就連畀人鬧係冇料貴價貨嘅加里夫巴利都開始融入球隊，首次為「銀河艦隊」梅開二度，結果協助皇馬以7:3大炒西維爾。張峰相信皇馬仲未收夠籌，今晚造訪西甲「失波王」華歷簡奴，隨時又係C朗、巴利同賓施馬3大殺手嘅數胡良機。