浦和柏市搶盃玩大佢

猪拉多纳

第21屆日聯盃決戰今年喺國立競技場爆發，由浦和紅鑽火併柏雷素爾。呢兩班波5日前先喺日職交過手，但係今場波雙方陣容都有變，唯一可能冇變嘅，就係跟足傳統又開入球大。

（開賽時間：周六中午12:05）

雖然係重要性最次嘅盃仔，不過對呢兩隊嚟講都好緊要。事關浦和响日職係就係仲有機會爭冠軍，但就落後榜首橫濱水手2分，又只係領先第3嘅廣島三箭1分，冇人夠膽話實得，先捧個日聯盃打底，總好過到時兩手空空。柏雷素爾今季因為兼顧亞冠盃，班人殘殘哋，職賽只排第11位，日皇盃係就係入咗16強，不過有排都未上岸，日聯盃係佢哋有盃落袋嘅最大希望。
杜明基斯 增島龍也紮住上

大家都要搏，柏雷素爾表面就畀到人「好有誠意」嘅正面感覺，佢哋個巴西外援李安度杜明基斯9月頭返咗祖家做左髖關節手術，近排終於返歸復操嘞。另一個增島龍也仲勁，呢個後衞9月28號右膝受傷，本來要抖8個禮拜，依家未夠5個星期，佢就話唔算太痛，今日可以紮住搏殺喎，真係其志可嘉。問題係有大谷秀和、橋本和兩件停賽嘅柏雷素爾，搵兩件狀態成疑嘅主力打決賽，係咪可以產生作用呢？由反面去睇，大家就知道佢哋班人真係好殘。
「新郎哥」森脇要贏波買戒指

浦和5日前喺日職主場贏咗柏雷素爾2:1，嗰場波前鋒興梠慎三、後衞森脇良太都坐波監，今場佢兩個都出得番，由呢樣就睇到兩隊陣容都有變，但係柏市係用兩件殘兵戥腳，浦和就有兩個主力復出，「新郎哥」森脇仲要話攞日聯盃冠軍獎金，買隻戒指送畀新婚老婆添，一邊當旺，一邊當黑，點都係浦和秤先啲。只不過，呢兩隊13年嚟响國立交手9次，戰果出現壓倒性嘅8大1細，1.65倍入球大似乎穩陣過浦和W嘞。