歐陸連線 早場推介強勢阿特蘭大

猪拉多纳

意甲早場利禾奴主場對阿特蘭大，主隊質庸態平主場都冇威力，Ali睇死佢哋未屆翻身時，今晚遇上實力勝一籌兼在升勢中嘅阿特蘭大唔夠揪，平手盤撐客軍。

（TVB301周日晚7時30分直播）

阿特蘭大經過季初災難開局後，近期表現同成績都有大有起色，近5場贏咗3場，周中主場賽和國際米蘭1比1，形勢上絕對不落下風，球隊兵源較足可以輪換出擊，頻密賽程有着數，雖然守將盧基尼、中場邦拿雲度拉因傷缺陣，另一守將史丹達杜停賽，但可以砌出嚟嘅陣容遠較利禾奴完整。Ali深信升勢中嘅阿特蘭大各方面條件都勝過利禾奴，即使作客亦足以坐和望贏。
利禾奴殘兵不利勤拚

毫無疑問，利禾奴係Ali心目中今季意甲最弱球隊之一，無論兵源同球員質素都差，預期難逃降班厄運，事實上佢哋近況極差，聯賽已經7場未贏過，今季5度喺主場出師亦只得1勝，主場都唔見有乜威力，佢哋啱啱上周中主場同拖連奴踢成3比3，前線表現尚算唔錯，但後防甩漏實在太多，今仗雖然有守將高達、基斯坦奴比斯尼、中場麥巴耶同艾佛鄧肯回歸球隊有望復出，但佢哋狀態都唔十足，現時中場線係佢哋傷停嘅重災區，莫斯基拉、比寧基利同比亞基安迪今仗都因傷缺陣，舒亞達利拿停賽，中場人手十分短缺，匆匆再戰以佢哋嘅有限兵源亦十分不利。