勝利船衝刺不得鳥

猪拉多纳

贏即提早直接升班

中超經過當年假波醜聞後，近年積極改善形象，隨住廣州恒大大肆招兵買馬，賽事重新獲得國際球壇關注，恒大更打入今屆亞冠盃決賽，令中超形象進一步提升。不過，講到賽事透明度，日本波始終勝一籌，即使日乙都有投X價值，踢落均均真真，好少出現問題球，自然玩得放心。

今次肥叔同大家研究日乙，神戶勝利船主場對京都不死鳥，捧主隊！今季日乙有兩支頂級球隊神戶勝利船同大阪飛腳助陣，查實易玩咗好多，兩隊波級數都喺呢個聯賽超晒班，直頭打日職都夠殺，依家出戰日乙猶如虎入羊群，結果亦正頭正路穩佔頭兩位。勝利船今場贏埋就提前取得直接升班資格，只要發揮正常，贏波絕對唔成問題。

（周日晚6時開賽）
維羅納主場又開餐

同日意甲賽事維羅納主場對卡利亞里，肥叔今季一直留意升班球隊維羅納，當正佢哋係銀行隊，呢班波勝在毫不起眼，踢落亦唔係好悅目，但勝在效率真係好高，今季聯賽主場錄得全勝紀錄，確係唔講得笑。維羅納走勢正盛，現階段仍然可以繼續跟進，今仗主場都係小讓平半，個盤都幾合理，上盤捧得過。

（周日晚10時開賽）