馬體會吔包好猴擒

猪拉多纳

今晚西甲矚目戲碼，梗係二哥馬德里體育會主場硬撼畢爾包，「床單兵團」主帥施蒙尼係典型功利主義者，由於嚟緊周中又要踢歐聯，佢一定會叫班手下快刀斬亂麻，盡早劏殺「巴斯克雄獅」，況且佢哋今季喺卡達朗球場全開「半場主勝」，數據咁堅不妨追多鋪。

（now 632周一凌晨零時直播）
對畢爾包撐「半場主勝」

施蒙尼喺球員時代兩度効力馬體會，但佢嘅巔峰期一定係喺意甲國米及拉素搵食嗰陣，「迷你世界盃」嘅唯勝利論思想，深深植根於施蒙尼心中。因此當佢踢而優則教後，為咗贏波無所不用其極，唔介意踢醜陋足球，令佢所執教嘅馬體會成為西甲異類。好似上仗作客弱旅CF格蘭納達，馬體會刻意讓出控球權，誘敵深入然後打反擊，簡單直接有效，配合一眾打仔作防線前嘅屏障，成為「床單兵團」贏波秘訣。

今晚馬體會迎戰作客不嬲腳軟嘅畢爾包，都係唔理好醜只求三分，畢竟周中歐聯只要主場贏奧地利維也納，出線16強便高唱入雲，重要性唔使多講，為咗養精蓄銳，施帥梗係希望今仗速戰速決，上半場拿拿臨鎖定勝局，之後搓住踢等收工，甚至可換走如迪亞高哥斯達同韋拿等正選，留力歐聯。其實馬體會最鍾意喺主場打閃電戰，今季喺卡達朗球場打過嘅七仗正式比賽，全部都喺上半場取得領先優勢，包括西超盃對「地上最強」巴塞，證明佢哋喺自己地頭出擊，初段特別sharp醒，作客蟲畢爾包無力阻人發達，半場主勝有1.7倍咪嫌少。