史卓錦標在望捧客W

猪拉多纳

挪超轉入大直路剩低最後兩輪，特林素聯賽、歐霸盃雙線發展踢到殘，搞到深陷降班漩渦，今仗（日）54主場迎戰史卓加斯特賽前，雖然專誠搵埋名將話當年，試圖以經典戰役激發球員護級鬥志，可惜面對劍指43年來首個聯賽冠軍、有望提前封王嘅史卓加斯特，根本講咩都難逃大敗，吼實2.05倍客勝啱數。

（開賽時間：周一凌晨1:00）
特林素正副隊長缺陣難捱

現時排聯賽榜尾3嘅特林素，僅以得失球差壓過薩普斯堡，嚟緊最後兩輪有乜依郁，隨時連護級附加賽都冇得打直接降班。特林素睇見形勢惡劣，賽前搵嚟球會名將夏夫斯特話當年，提番99年作客史卓加斯特，開波4分鐘就打少個兼且半場落後1:3，好在鍥而不捨最終反勝6:3締造經典，希望球員今場可以複製贏波奇迹喎。弊在特林素正副隊長高邊倫及賓迪遜因為傷停缺陣，冇咗呢對中後場核心領軍點捧得落呀？

相反史卓加斯特嚟到衝刺階段夠晒正氣，成功打出一段4連勝目前領先次席洛辛堡3分，只要今仗贏波，同時洛辛堡又失分嘅話，已經可以提早一輪稱霸。即使史卓加斯特同洛辛堡齊齊贏波，由於前者目前揸住多達15個得失球差優勢，亦都係大半隻盃袋咗落袋，仲使驚佢哋今晚唔搏？