羅馬勒唔住衝擊11「連」勝

猪拉多纳

開季10連勝創意大利足球史上最佳開局，羅馬家陣可以話係遇神殺神，今晚呢隻唔識輸嘅「雌狼」會造訪拖連奴，就算大佬托迪仲養緊傷，以波里路、拿積同費奧倫斯孭飛嘅三叉戟都夠照，1.75倍客勝放心捧。（TVB301周一凌晨3:45直播）
拖連奴9月底起未W過

羅馬上場聯賽有托迪同謝雲奴倦勤，好多人擔心佢哋會搞唔掂基爾禾，殊不知羅馬踢落一樣佔盡上風，全場足足有成18腳攻門，基爾禾最後僅輸0:1真係執番身彩。預計上仗後備落場有優異演出嘅費奧倫斯會復任正選，夥拍波里路同拿積合組鐵三角，對住近6仗勁失13球嘅拖連奴，即使托迪同謝雲奴繼續養傷，都夠晒火力造低對手。

拖連奴自9月底開始未贏過波，雖然話阿利斯奧施斯今季已經貢獻7個入波同3次助攻，不過羅馬防守要員貝拿迪亞同迪羅斯賽前就話已經研究過施斯嘅比賽影片，家陣呢位仁兄樹大招風，想喺羅馬後防搵着數唔容易，況且羅馬開季10戰只係失過1球咁大把，攻、守兩瓣都冇得頂，拖連奴邊會係羅馬手腳吖？