「黃色潛艇」不設防 艾爾切受讓下盤抵玩

猪拉多纳

聽朝清晨有場西甲獨腳戲，由艾爾切主場恭候維拉利爾，照睇牌面，呢場「巴倫西亞自治區打吡」當然係維拉利爾秤先，弊在佢哋後防今仗唔齊腳，過往去親馬天尼斯華利路球場又未威過，艾爾切受讓平半，1.98倍下盤好似抵玩啲喎！

（開賽時間：周二清晨5:00）
維拉利爾缺中堅卓祖

維拉利爾開季頭6戰保持不敗，但最近表現明顯跌Watt，就講上場輸畀基達菲0:2場波吖，「黃色潛艇」後防連環犯錯，中堅梅沙基奧全場演出騰騰震，門將沙治奧阿辛祖仲踩波車累球隊失波添，搞到賽後要公開向球迷道歉，幾鬼羞家呀！佢哋條防線表現嚇死人不特止，最弊係防中柏保路恩尼基斯今仗要停賽，中堅卓祖左腳腿筋撕裂，計埋養緊傷嘅左閘祖傑，維拉利爾中後場穿晒大窿喎！

睇番數據，艾爾切歷嚟喺馬天尼斯華利路球場恭候維拉利爾嘅正規賽事，係一次都冇輸過，今季主場出擊更加和過皇蘇、贏過愛斯賓奴，對住皇馬亦只係僅輸1粒，硬淨成咁，對住後防唔穩陣嘅維拉利爾隨時有機會偷雞。