祖記搶分大無畏

猪拉多纳

背水一戰 焗攻銀河艦隊

今晚歐聯最矚目大戰首選B組祖雲達斯主場大戰皇家馬德里，祖記目前3戰只得2分，出線勢危，故今仗鬥「銀河艦隊」絕對係非勝不可嘅背水一戰，估計佢哋主場必定焗攻搶3分。不過，對手皇馬嘅金鑽雙翼C朗及加里夫巴利終於擦出火花，近兩仗合共轟入7球，後者仲有4次助攻，呢對「7-11」足以摧毀世上任何防線，更何況祖記有後防支柱基亞連尼停賽，暴露大缺口，恐怕搶到入波亦難保清白之身，投X首選入球大。

（有線61及201台周三凌晨3時45分直播）
7-11組合嚟料 火力驚人

皇馬分組賽3戰全勝攻入12球，唔好忘記加里夫巴利之前因傷及缺態，只曾於其中兩場後備入替，但球隊仍獲此佳績，足證「銀河艦隊」超晒班。依家連呢位威爾斯國腳都全面爆發，進攻火力更加驚人，皇馬近兩場聯賽攻入10球，正係呢對「7-11」組合產生嘅化學效應，加上連久沉嘅法國射手賓施馬近期都弗番，呢個進攻三叉戟要爭取入球絕對唔難。

或者有人認為皇馬榜首有5分優勢，唔一定去盡，咁又未必，球會投入巨額資金收購球星及提供天價人工，就係要贏到盡、威到盡。尤其是有傳助教施丹對帥位虎視眈眈，安察洛堤更加唔可以有些微行差踏錯，首季一定要交出亮麗成績，以鞏固帥位，因此雖然佢本身雖係祖記名宿兼前教練，但今次倒戈絕對唔會畀面舊東家。
冇基亞連尼 防線有隱憂

祖雲達斯只有2分在手，實在唔可以再失分，其實佢哋上次作客皇馬其實表現唔差，起碼夠膽同對方搏槌。無奈基亞連尼下半場初段已被逐，最終寡不敵眾輸1比2，相當唔抵。

祖記今仗返到主場，想出線已無退路，踢法肯定會更加進取，而前鋒泰維斯、中場保羅普巴狀態弗，甚至連派路都重拾射門觸覺，皇馬後防唔算穩，祖記入波機會樂觀，問題係對手攻力太勁，加上冇埋停賽嘅基亞連尼鎮住防線，祖記最終係「有利可圖」，亦或「入不敷出」，存在唔少變數，但估計全場入波數字唔會少，捧大啱數。