曼城放膽攻中央陸軍

猪拉多纳

曼城近年先後贏得英格蘭足總盃同英超冠軍，但係一出戰歐洲就成為笑柄，連續兩屆都喺歐聯分組賽畢業。佢哋今季喺領隊比歷連尼帶領下，暫時以6分排喺D組第2名，只要今晚喺主場砌低俄羅斯球隊莫斯科中央陸軍，幾乎可以提早出線，成班球員點會唔搏，1.51倍「讓主」梗係要支持。

（有線62及202周三凌晨3:45直播）
彭迪利蒙把關夠穩陣

「藍月亮」依家以3分壓住中央陸軍，只要佢哋同拜仁齊齊贏出，即使曼城之後兩仗輸晒，都可以憑對賽優勢出線。眼見球隊有望達成心願，班人又點敢怠慢，以佢哋上仗大炒諾域治7蛋嘅Fit爆狀態，今場想贏多一球唔難。曼城上場聯賽收起赫特改出彭迪利蒙，最後一關反而更見穩陣，比帥講明今場繼續用佢，大門無憂！

曼城中場耶耶托尼上仗作客受到種族歧視對待，雖然中央陸軍被罰下場主場鬥拜仁需要關閉部分看台，但佢哋個董事長巴巴耶夫尋日仲死撐，批評外界指控佢哋種族歧視，目的係抹黑俄羅斯足球喎！耶耶托尼聽到肯定唔Happy，有咩好得過自己親自領軍贏波復仇呀？

中央陸軍陣內有「卡士」嘅球員唔多，入球集中喺射手杜姆比亞、翼鋒蘇蘭托錫身上，一旦畀人睇實球隊就容易啞火，而且佢哋連續7場比賽都有失波，即使有俄羅斯國腳艾堅菲夫把關，亦不宜睇好。2.45倍客勝。