方程式熱完身發威

猪拉多纳

　　今期又係谷草賽事，唔到我唔信，呢條真係魔鬼跑道，長期存在所謂偏差，好似最近咁，唔買放頭馬，已經輸一半咁滯，夠膽買後上馬，真係膽生毛。呢類咁賽事，免得過就免，脆脆玩一百幾十無傷大雅，想大注出手，咪制呀。

　　第二場四班1000米。「心甜意合」今季三班跑3場，次次唔同場地，落敗距離愈來愈遠，存心減分落班，所以，近績可以唔使睇。

　　心甜意合班檔兩利

　　呢場我揀「心甜意合」做膽，係貪隻馬班利及排1檔，話晒上季四班取3W，但大家都知吳帥部署高明，或者落班睇定先再算，目標可能未必今場，我阿棟唔係滑頭，係有碗話碗，將事實講畀廣大讀者知。

　　第五場四班1650米。「威駿寶」兩次在呢個路程跑第二名，兩場季軍分別係「勁飛翔」及「勝任有餘」，呢兩匹葉馬屬於此程好手，直接顯出前駒在四班一定可以出人頭地。

　　「威駿寶」今場回到谷草，好彩抽到內檔，而且杜利萊係都唔放手，睇格局當然係想搏到贏為止。

　　復出表現唔曳

　　第八場三班1200米。「方程式」閹完復出表現唔曳，上仗在呢項路程後上獲殿，雖然又係好似上季咁樣，擺脫唔到「四哥」命運，但總算輸得唔係好遠，唔算冇水準。

　　「方程式」今次再跑，期望熱身一仗後狀態更進一步，發揮出的威力比上場更勁，咁就有機會食到尾胡。