馬賽散晒拿玻里盡數衝榜首

猪拉多纳

多蒙特同阿仙奴火併嘅同時，同組拿玻里亦要趁機搶分，爭取爬頭。F組3隊同得6分，形勢非常緊湊，再咁發展落去，最後隨時要計對賽成績，甚至要計埋得失球，先至可以決定兩個晉級席位誰屬。拿玻里主場鬥最弱嘅馬賽，唔止想贏波，仲希望入多幾球，以備不時之需。馬賽3戰全敗，基本上可以執定包袱，加上狀態奇差，有潰敗迹象，可捧讓球主勝。

（有線63台周四凌晨3時45分直播）

歐聯3支意甲球隊，拿玻里表現最好，尤其係進攻充滿侵略性，荷西卡利祖、咸錫、恩斯治尼、彭迪夫皆能傳擅射，兼具個人突破能力，走動非常靈活，亦有中鋒希古恩正面衝擊對手防線。教練賓尼迪斯手上大把進攻好牌可用，對住小組最弱嘅馬賽，更可放膽主攻。由於3隊積分咬緊，拿玻里絕對唔可以喺馬賽身上失分，仲要盡量爭取「燕梳球」，確保萬無一失。

馬賽上次主場都輸畀拿玻里，莫講話出線，就連爭取踢歐霸嘅機會都非常渺茫，因此戰意肯定唔及拿玻里。加上佢哋近期亦陷低潮，最近6仗僅1和5負，以目前狀態應付兩條戰線，實在頂唔順。
入兩球最低消費

睇佢哋之前作客多蒙特，踢來毫無還擊之力，最終慘吞3蛋收場，今趟去意大利，淨輸兩球屬基本消費，拿玻里即使讓波，讓球主勝仍然值得捧場。