美斯未弗巴塞半場咬唔入ＡＣ

猪拉多纳

今晚歐聯H組矚目大戰，巴塞隆拿返主場迎戰AC米蘭。雙方近年喺歐聯非常有緣，無論分組賽定淘汰賽經常碰頭，由於AC跌落低谷，加上作客魯營戰績欠佳，教頭阿里基為保住飯碗，今仗一定擺出鐵桶同你玩拉布，適逢巴塞射手美斯陷入球荒，初段未必咬得入決心死守嘅AC，半場和有分頭更加抵玩。

（有線64及203台周四凌晨3時45分直播）
紅黑兵團穩守博偷雞

AC近四戰未嘗一勝，教練阿里基深陷信任危機，甚至有傳太子女芭芭拉想搵金牌教頭查帕東尼頂佢個位，雖然行政總監加利安尼力撐阿帥，但據聞若未來兩場冇乜起色，阿帥烏紗難保。睇番AC近五次作客巴塞僅得兩和三負嘅劣績，去到魯營球場可謂九死一生，阿帥為咗保住飯碗，預計今仗會穩字行先，希望守到一輪再博偷雞，因此全線龜縮亦係人之常情。

巴塞破密集最利嘅尖刀，梗係球王美斯喇，近六次對AC取得六個士哥，絕對係「紅黑兵團」嘅剋星，可惜佢自傷愈復出後，未回復托弗狀態，之前四場聯賽全交白卷，有時唔順起上嚟，愈心急就愈入唔到波，面對布上天羅地網嘅AC，巴塞喺初段難佔甜頭，半場和有2.95倍值得一試。但始終「地上最強」質勝一籌，可以考慮埋有3.8倍嘅和主。