莫帥大執位車仔除「克」氣

猪拉多纳

車路士日前喺英超不敵紐卡素後，教頭莫連奴直指自己犯咗11個錯誤，揀錯正選11人，今晚歐聯E組迎戰德甲史浩克需要「深入思考」陣容人選，唔會重複犯錯咁話，「藍戰士」聽見莫帥咁講，落到場點敢唔去盡，吼實1.9倍「讓主」啱數。

（有線62及202周四凌晨3:45直播）
史浩克冇亨特拉爾 法芬

車路士陣中巨星個個獨當一面，連莫連奴都講過將某啲球員擺喺後備，對佢哋好唔公平，所以每場都要慎重思考正選陣容。可惜上場輸畀紐卡素後，據聞莫連奴對大衞雷斯、桑馬達嘅戰術服從能力好不滿，今場或貶佢兩個做後備，林柏特同艾殊利高爾亦因表現差可能冇得踢。不過車仔陣容雄厚，相信今晚邊個「有得留低」擔正，又或者從冷板彈出嚟獲得孭飛機會，都勢必砌盡博取莫帥歡心，希望趁機奠定正選位置，就算費托話有傷在身唔踢得，伊度奧同舒賀爾尼等都孭到飛，火力絕冇問題。

另邊廂嘅史浩克，近期作客成績好過主場，近7場6勝1和冇輸過，惟當中不乏德甲榜尾嘅布倫瑞克，中下游賀芬咸與緬恩斯，甚至德盃鬥丙組仔達斯泰特，成績並非想像中咁「堅挺」。中前場施沙拉爾、達斯拿及麥斯美亞雖然狀態唔錯，可惜嚟到歐聯舞台始終略欠火候，缺少箭頭亨特拉爾做一錘定音角色，法芬又患感冒缺陣，今場到訪史丹福橋難逃再度大敗嘅命運。