3線歐霸陪你打邊爐

猪拉多纳

打邊爐最緊要乜？唔係湯底配料，亦唔係個爐個煲，係有冇好波睇至真！聽晚歐霸將會分3段時間直播，由1點開波睇到6點，天氣轉涼，食消夜一邊「烚下烚下」，一邊睇好波，咁先識歎嘛！
「山根」之戰-1好味道

揀波有時唔可以睇表面，好似今晚歐霸D組榜首大戰──俄超球隊魯賓卡山主場迎戰英冠仔韋根，前者喺近五聯賽贏得一場咁大把排尾五，衰到貼地，但其實佢哋暫冇降班威脅，咁樣揸流攤法，擺明係想專攻歐霸喇，讓球主勝有買趁早！

（有線61、64、201及203台周五凌晨1時直播）

雖然魯賓卡山喺聯賽衰到暈，但歐洲賽就唔係人咁品，連埋外圍賽在內，喺今屆七場歐霸贏咗六場，霸氣十足，加上魯軍只要今仗贏波，佢哋出線機會就高唱入雲，點會唔搏呀？雖然韋根嘅曼聯借將尼克包維持續大勇，近七仗僅一敗，但拍埋踢開歐霸嘅魯賓卡山，始終級數差成條街，莊家明顯心水清，韋根無論客W（6.8倍）定讓球客勝（2.7倍）都冷到無倫，並非無的放矢，相信魯軍可藉地利輕取對手，不妨直取讓球主勝。