流浪者搶W「雄心」丈

猪拉多纳

今日晏晝澳職有場獨腳戲，由墨爾本雄心主場迎戰西悉尼流浪者。愈踢愈沉嘅墨爾本雄心，上輪聯賽作客大敗畀布里斯班獅吼，成班球員正面臨信心危機，偏偏佢哋今次對住愈戰愈勇西悉尼流浪者，睇怕都會輸多鋪，1.7倍客勝值得支持。

（有線64周五下午4:30直播）
雄心未開齋士氣曳

仲未開齋嘅墨爾本雄心，原本喺上個月主場對中岸水手好大機會開W，點知班波唔生性，領先兩球都被對方逼和，之後仲連輸兩場，大大打擊士氣。雄心家陣暫時只係得射手大衞威廉斯有進帳，想搵多個人幫手入波都冇，試問又點可以贏波先？同時，預計喺今仗復出嘅基維爾，又喺練波嗰陣整親，需要繼續養傷，加上防線大將基斯諾保仲未好番，都係唔多信得過。

上季喺常規賽封王嘅西悉尼流浪者，已經跨季連續16場常規賽不敗。佢哋對上兩仗更分別砌低死敵FC悉尼同反勝阿德萊德聯，狀態Fit到漏。新加盟嘅射手杜米祖歷極速融入陣中，上仗又有士哥，配合原有鋒將馬克布歷治、中場小野伸二等人，相信有力爭取3連勝。