廣州强鋒首爾焗攻 亞洲王者「大」戰！

猪拉多纳

亞洲王者戰今晚上演！亞冠盃決賽次回合，廣州恒大（足智彩譯FC廣州）喺天河主場迎戰FC首爾，恒大首回合以2:2賽和首爾，王牌孔卡講明恒大今晚先會喪攻「見真章」，有丹恩奴域壓陣嘅FC首爾為咗博翻身，亦焗住進攻，一於熱捧1.45倍入球大，食住花生睇王者「大」戰啦！

（now670台周六晚8:00直播）

雖然廣州只要和0:0或1:1就會歷史性捧亞冠盃，但主帥納比喺賽前講明會繼續主攻，佢哋仲喺宣傳海報用數學公式暗示要大勝3:0，又用名貴鋼筆代表恒大、用普通原子筆諷刺對手係「平民」，口氣大到冇朋友！《北京青年報》又爆料，話恒大計劃請合作夥伴皇馬嘅助教施丹，以至費高、希亞路去現場觀戰，恒大班球星梗係要出力入多幾粒攞彩啦！
納比 孔卡講明喪攻

除咗張林芃傷愈，目前以13球暫居亞冠神射手嘅穆里奇亦趕得切復出，配合王牌射手孔卡，鋒力唔需要懷疑。尤其係孔卡以前踢富明尼斯嗰陣，曾經喺08年南美自由盃決賽屈居亞軍，深知喺洲際大賽輸波嘅滋味，令佢決心喪攻，唔想再留低遺憾：「有過咁嘅經驗，喺呢種關鍵時刻好有幫助，首回合只係互探實力，次回合先係生死戰！」何況恒大W埋今場波，呢屆嘅總獎金就會達到1.6億人仔，孔卡又點會唔搏先？

當然，首爾雖然冇恒大咁多球星，南韓媒體仲話呢場波係「大衞對哥利亞」之戰，希望首爾可以好似「大衞」咁斬殺巨人，佢哋又預言主力丹恩奴域肯定會被「嘜」，要靠梅里斯奧摩連拿發威先掂喎！點都好，韓媒咁講其實只係想幫首爾減壓啫，既然首爾殺得入決賽，又點會係弱旅呀？
首爾丹恩奴域士哥多

而且佢哋啱啱喺韓職「國家打吡」反勝水原藍翼，結束5戰不勝頹勢，教練崔龍洙當堂意氣風發：「我哋會食住個勢反轉廣州！班球員贏波嘅決心仲勁過我囉！」咁又係，佢哋嗰位星級射手丹恩奴域自8強起嘅5場波入面攻入4球，效率唔差得過恒大陣中任何一位球星，今晚兩軍對碰，肯定係一場對攻大戰！
首回合：廣客和2:2