南北戰爭祖記拿玻里大激鬥

猪拉多纳

意甲爆發南北大戰，「北方王者」祖雲達斯主場鬥對「南方惡霸」拿玻里，意大利南北經濟發展懸殊，兩地一直存在深層次矛盾，呢份敵對態度甚至伸延至足球。祖記同拿玻里對壘，唔止係聯賽爭標咁簡單，亦牽動民眾神經，兩隊都冇得保留，必傾力一搏求勝，戰況肯定激烈，為勝負增添變數，寧捧入球大。

（TVB301周一凌晨3時45分直播）

意大利北部經濟遠比南部發達，北方人視南方人係負累，多年來一直有聲音，要求放棄南方，將意國一分為二。政治上當然無法實現，民眾唯有透過其他途徑，發洩呢種南北對抗情緒，足球成為主要戰場。例如另一支北方代表AC米蘭早前對拿玻里，就有AC球迷高呼歧視南部那不勒斯嘅口號，令當局好頭痛。拿玻里擁躉亦唔好惹，近期頻頻喺歐聯搞事，非常火爆。
經濟差距大互相敵視

呢種背景之下，令祖記同拿玻里處於唔係你死，就係我亡嘅局面，更何況係爭標「6分波」，雙方必豁出去求勝。尤其係祖記喺歐聯連番失利，唔係話爭冠，連小組出線都好危，現時已將衞冕意甲列為首要目標，若然今仗再失分，隨時被羅馬拋離，贏波已成唯一選擇。

慶幸祖記中前場球員泰維斯、維達爾、保羅普巴當勇，要入波並唔難，但防線始終唔可靠。拿玻里情況相近，進攻鐵三角希古恩、荷西卡利祖、咸錫有幾犀利，已唔需要多講，但失波數字亦唔少，上周中歐聯鬥馬賽都要失兩球，兩位守將比圖斯及辛尼加受傷缺陣，今仗更難保持清白之身，捧大盤啱數。