ＡＣ作客爆基求翻身

猪拉多纳

意甲傳統班霸AC米蘭正處於水深火熱中，近績奇差人腳亦嚴重不整，不過今晚作客對基爾禾卻是打翻身仗的最佳良機，作為AC fans嘅Ali對紅黑兵團投下信任一票，強捧1.83倍客勝。

（TVB301周日晚10時直播）

AC米蘭於意甲處於近20年來最差開局，目前只領先降班區三分，近11場聯賽只贏3仗，上輪主場淨吞兩蛋表現奇差，上周中歐聯作客巴塞隆拿亦輸1比3而回，教練阿里基的戰術與排陣屢遭批評，現在對佢哋講，每場波都可能係被炒前最後一仗，今場AC更要殘陣出擊，防線馬迪亞斯施維斯達，迪施基利奧，前線柏仙尼同艾沙拉維都要養傷，主力箭頭巴洛迪利停賽，戰鬥力進一步削弱。不過Ali對佢哋尚未死心，皆因對巴塞一役，AC嘅表現同鬥志畀到我良好印象，呢班波級數始終遠勝全意甲最弱嘅基爾禾，而且反彈心切，單憑卡卡與蒙杜利禾嘅級數同狀態，今晚都足夠攞晒3分。
基爾禾攻守皆弱難捱

基爾禾毫無疑問係目前意甲最弱球隊，攻守都差，上輪作客博洛尼亞雖然以0比0守和，終止6連敗劣績，但全場大部分時間有8名球員塞喺自己禁區，見波就一腳清，表現根本冇意甲水準，教練辛連奴除死守外毫無辦法帶領球隊走出困境，今晚面對決心十足嘅AC米蘭，Ali唔相信佢哋可以頂到尾。