水手再破「獅吼」功

猪拉多纳

妹頭呢個禮拜去咗南韓拍旅遊特輯，邊食邊玩邊開工就梗係正啦，但拍嘢要周圍趕場景，好多嘢都係走馬看花，如果同朋友再去一次，慢慢體驗一下就好啦！南韓呢邊就好多電視台，喺酒店轉台都轉到手軟，但就唔多見佢哋有澳職播放。所以今個星期嘅賽事，要等到返香港先睇到啦。
獅吼射手貝利沙養傷

今日正正有中岸水手同布里斯班獅吼嘅大戰，冇得睇直播真係令人心掛掛。水手、獅吼可以話係現今澳職最強嘅兩支球隊，同時分別係最近兩季嘅總冠軍，前季雙方上演嘅總決賽大戰，更加係扣人心弦，雖然獅吼當日贏咗，但水手上季就兩次主場都贏番對方，算報番半次仇。

水手嘅王牌射手麥比連已經完成外借，重返球隊報到，不過佢就唔會今日咁快上陣住！但妹頭仍然睇好水手，因為佢哋喺主場真係好勁，常規賽由上季至今踢15場贏足12場，相反獅吼今季兩場作客波，一場半爆冷輸畀勝利，另一場補時險勝鳳凰，作客表現實在麻麻。而水手慢熱穩重嘅踢法，相信令獅吼無法踢出快速反攻嘅節奏！獅吼射手貝利沙繼續養傷，令布萊治冇咗個好拍檔，好難突破水手嘅尼基蒙哥馬利同約翰赫捷臣一對防守中場嘅箝制，所以妹頭今日就睇好水手，可以再小勝獅吼一次啦。

（有線64台周日下午2時直播）
Aiyana推介

中岸水手 主客和 主勝