諾士郡易帥軍心不穩 奧咸射手復出吼主勝

猪拉多纳

今晚足智彩由英格蘭聯賽錦標第3圈打晒骰，卡爾萬睇中奧咸迎戰諾士郡呢場英甲對決，現時喺聯賽墊底嘅諾士郡低潮未過，換帥後短期內亦難收成效，面對有查理麥當勞復出數胡嘅奧咸，吼實1.75倍主勝。

（開賽時間：周三凌晨3:45）
客軍防線穿窿

諾士郡上星期再度易帥，宣布沙恩戴利走馬上任，成為球會4年內第9名教頭。雖然沙恩戴利接掌後話希望為隊波帶嚟穩定性，可惜初嘗教頭滋味嘅佢明顯欠缺經驗，上任短短一星期亦難以透徹了解球員特性，日前首度領軍出戰英總就落筆打三更被乙組仔哈特普爾淘汰。

再者，諾士郡箭頭希尼斯今場停賽，中場卡路姆麥基哥雖為首席射手，惟最近作客例牌啞火，近5場入得1球，以佢哋今季11場作客3和8負、近4場每場最少失2球嘅劣績，好難捧得落手。相反奧咸後衞干洛布朗擺脫膝傷復出，令防線變得穩固外，英國傳媒話箭頭查理麥當勞亦克服腳踝傷患，今場復出孖住阿當朗尼攻堅，要撕破諾士郡紙紮防線易過借火。