烏拉圭雙槍轟約旦

猪拉多纳

哨牙蘇卡雲尼跨洲搶頭胡

世界盃附加賽首回合今日揭開戰幔，有四個洲份嘅隊伍要跨洲互相廝殺，南美洲勁旅烏拉圭先作客亞洲嘅約旦，前者坐擁兩大着晒火射手蘇亞雷斯同卡雲尼，淪落到要踢附加賽已經醜死怪，為免夜長夢多，今仗作客都會撳住搶，約旦實力差幾條街，好難再創奇迹，斯維認為可以直取讓球客勝。

（now 671周三晚11時直播）

貴為上屆世盃四哥，烏拉圭喺南美區外圍賽中段忽然失晒魂，若非最後五仗贏四場，恐連附加賽資格都不保，雖然「烏圭」王牌前鋒科蘭漸走下坡，但以紅軍射手蘇亞雷斯及聖日耳門前鋒卡雲尼為首嘅鋒線，依然弗到漏油，其中「哨牙蘇」轟入11球，力壓美斯、希古恩、阿古路、法卡奧等名牌前鋒，榮膺南美區外圍賽最佳射手，加埋其他喺歐洲搵食嘅基斯甸洛迪古斯、加斯頓拉美利斯等，火力之強唔講得笑。

至於世界排名第70位嘅亞洲球隊約旦，早前同烏茲別克爭附加賽席位嘅兩回合賽事都打和，僅僅靠互射12碼淘汰對手，贏得冇乜說服力，佢哋以喺國內聯賽効力嘅土炮為主，全屬烏合之眾。
約旦三流防線隨時被炒

約旦一向踢法都係防守大過天，近六仗只失三粒好似幾穩陣咁，但要留意佢哋所遇對手只係贊比亞、阿曼、科威特、烏茲別克等三流球隊，絕對唔能夠同烏拉圭相提並論。今仗面對「哨牙蘇」等球星嘅狂轟猛炸，約旦相信唔捱得幾耐，斯維認為烏拉圭可在首回合入多幾粒，盡早鎖定出線資格，讓球客勝咪錯過。