烏拉圭超班 踩扁殘陣約旦

猪拉多纳

逐夢對決爭最後入場券

今晚世界盃外圍賽附加賽首回合爆發「逐夢對決」！主隊約旦為咗實現整個阿拉伯區嘅夢想，當然傾盡全力喺呢場「巨象與螞蟻之戰」爭勝，不過對手烏拉圭同樣背負幾代國民夢想，近期狀態大勇嘅蘇亞雷斯亦講明唔會因實力差距留手，誓要一手粉碎對手美夢，當然力撐1.81倍「讓球客勝」！

（now671台周三晚11:00直播）
約旦多名主力缺陣

今次係約旦自1985年參加世盃外圍賽以嚟，最接近打入決賽周嘅一次，呢場比賽當然係舉國矚目啦！約旦國王阿卜杜拉二世亦開聲打氣︰「無論結果係點，希望球隊嘅努力得到回報。」球隊新領隊賀森哈辛喺球員時代曾帶領埃及打入90年世盃決賽周，自然明白呢個夢想有幾重要，佢話：「今次唔止約旦為咗呢個夢想奮鬥，而係成個阿拉伯都為此努力！」

可惜人算不如天算，約旦大軍今場缺少多名主力，除咗正選門將沙菲、隊長迪比爾同埋中場法塔夏全部停賽之外，兩名後防主力艾特美尼及安拿斯耶仙亦因傷缺陣，得番阿基爾、前鋒巴華巴及艾卡里迪等主力，陣容天殘地缺，又點頂得住烏拉圭一班球星來犯呀？
烏拉圭雙箭頭弗爆

烏拉圭今次都算精銳盡出，當中最炙手可熱嘅當然係喺英超停完賽後，為利物浦狂入波嘅蘇亞雷斯啦！「哨牙蘇」喺今季聯賽雖然只係踢咗6場，但已經入咗8球，仲試過1次帽子戲法添。

「哨牙蘇」亦講明，今場唔止係為一班曾經見證烏拉圭奪得世盃嘅老球迷，更希望畀新一代睇到希望：「希望佢哋都可以見到烏拉圭喺世盃大舞台表演，我哋會盡一切所能去做！」至於另一前鋒卡雲尼今季喺巴黎聖日耳門踢咗15場亦都有11個士哥，約旦喺呢兩位效率超高嘅前鋒夾攻下，真係難逃大敗喇。
Data King 約旦每場頂多入一粒

‧約旦近7戰都未試過取得超過1個入球。

‧烏拉圭近6戰有5次取得至少2個入球。

‧蘇亞雷斯喺2014世盃外圍賽，至今共攻入10球。
乜都玩錦囊 烏拉圭攻強守弱博大

烏拉圭近8戰有6場開出入球大，亦經常取得至少兩球進帳，加埋佢哋近7戰得1場冇失波，反映防守唔算太好，約旦鬥心夠嘅話隨時偷到雞，攻強守弱，最利開1.82倍入球大。
世盃附賽制

採主客兩回合制，現為附加賽首回合。若兩回合計打和計算作客入球優惠，未分勝負將於次回合法定時間後加時30分鐘，加時階段仍計算作客入球優惠，再和則以互射12碼決勝。