悉尼客勝有本有利

猪拉多纳

最近有個調查顯示，出街冇帶手機所帶嚟嘅不安感覺，比冇錢在身嚴重得多。妹頭真係好認同o架，因為我早幾日人在韓國，手提電話居然失靈，雖然未至於完全失去聯絡，但就真係好唔方便囉，無論係公事或家事乜事都好，手機可以同人保持零距離，遙控溝通無障礙o架。

又要拍嘢又要寫稿，仲要部手機傻咗，好辛苦先借到部電腦上網搵料寫稿。我成功上番澳職官網睇上周精華，原來FC悉尼終於反底贏到波，3比2嘅賽果都好有「悉尼味道」，咪就係攻強守弱囉！不過，睇到佢哋差唔多成個鐘踢少一個都贏到墨爾本勝利，其實都收貨o架喇。悉尼除咗早前證實要長抖嘅後生仔賴恩格蘭外，今日可以夫添，教頭法拉拿鍾意派邊個上場都得。
雄心傷兵多難贏波

相比悉尼，雄心今屆表現更唔掂，踢咗五場澳職得兩和三負，仲未開齋，其中只有一場有入波，教頭艾萊斯都受到唔少壓力。佢哋個如意算盤原本係由基維爾做重心，點知呢位昔日球星到依家都仲因為腳踝受傷唔出得，十字軍營內仲有前鋒戴蘭麥阿里士打、中場安格拿，同積臣荷夫曼，以及後防重要球員基斯諾保幾位做營友，呢班傷兵唔出得，所以雄心一直打唔得起。今日雖然有主場，但睇嚟道勝利之門應該未係時辰開門，所以都係支持悉尼客勝囉。

（有線64台周五下午4時30分直播）