喀麥隆內訌捱「細」界

猪拉多纳

伊度奧自爆畀隊友針對

非洲區世盃外圍賽繼續開戰，今晚第3圈次回合賽事就由兩支首回合打和0:0嘅球隊交手，喀麥隆主場惡鬥突尼西亞。喀麥隆人腳較佳，但衰在唔團結，射手伊度奧仲自爆畀隊友針對，想入波都難啦！對家突尼西亞守強攻弱，與其估邊隊贏，不如轉捧1.55倍「入球細」仲穩陣。

（開賽時間：周日晚10:00）

表面上，喀麥隆有名牌射手伊度奧壓陣，入波理應唔成問題，但係呢位近年不時同國家隊鬧不和嘅車路士前鋒，似乎就得唔到隊友信任。首回合賽事明顯見到佢同其他球員貌合神離，連佢自己都忍唔住喺賽前訴苦，插班隊友忽視自己︰「佢哋都冇諗過交波畀我，搞到我要經常返中場攞波！」

除咗隊長伊度奧，就連出擊左閘伊高圖，都加把口話自己喺國家隊受到不友善對待，好懷疑班隊友係咪「眼紅」一啲上晒位嘅球星！你猜我度咁唔團結，仲點樣爭取入球先？最重要係主帥禾卡聽到伊度奧嘅「唔傳波」論，都話簡直係「幼稚園Level」思維，佢深知喀麥隆問題多多，賽前講明話寧願穩打穩紮唔會搶攻，咁嘅環境，入波又點會多呀？
突尼西亞連續4戰冇失波

突尼西亞上仗表現唔差，可惜班人嘅把握力實在麻麻，最終只能交白卷而回。無疑突尼西亞牌面比較輸蝕，但查實佢哋近3次同喀麥隆交手都係和局收場，雙方實力差距唔大，而且呢班波已經連續4戰保持清白身，今晚再遇喀麥隆演生死戰，肯定會繼續以守為攻，入球細就最抵捧。
首回合：喀客和0:0