法國All In「大」起烏克蘭

猪拉多纳

次回合生死戰改踢雙箭頭

面臨20年嚟首次冇份亮相世盃決賽周嘅危機，法國國家隊眾將呢排畀國民插到開花，今晚喺世盃外圍賽附加賽次回合回師巴黎恭候烏克蘭，領隊迪甘斯講明會「All In」，搵賓施馬同基奧特擔正踢雙箭頭陣式喪攻！不過講就容易，烏克蘭已經連續12場不敗，一對「魔鋒」耶莫蘭高同蘇素亞又鬼咁有威脅，隨時隊番一兩粒，橫掂雙方防線都唔齊腳，捧1.95倍大好過！

（now635台周三凌晨4:00直播）

法國喺首回合淨吞烏克蘭兩蛋，歷史上亦從未試過有歐洲球隊喺附加賽落後0:2嘅情況下躋身決賽周，所以普遍國民都睇死「高盧雞」。據《巴黎人報》調查顯示，89.7%國民唔信法國入到決賽周，日前國家隊喺基地公開操練嗰陣，更有球迷舉起「France-Brazil：PS4 soon」橫額，寸法國出戰巴西世盃情景只會喺遊戲機出現，咁畀人睇死法，班國腳又點可以唔做番齣好戲先？
法足總主席探班「恐嚇」球員

消息話法國足總主席諾埃爾賽前特登探班，向每位球員講：「有冇諗過出局所帶嚟嘅後果？國家隊義工同法國足總成員嘅心情又會點？」希望用「恐嚇」手法激勵一班國腳。
網民票選踢拿斯尼做後備

法媒le10sport賽前搞咗個投票，結果艾拉（27%）、拿斯尼（23%）同雷米（17%）就被選為最應該退居後備嘅3位球員，外界相信領隊迪甘斯仲會信艾拉，但應該會以華布拿頂替拿斯尼，並派遣賓施馬夥拍基奧特出任雙箭頭，擺明一副喪攻格！

不過攻還攻，法國今晚有中堅哥斯尼停賽，華拉尼好大機會臨危受命，但呢位皇馬中堅只係啱啱克服膝傷，狀態不足隨時成為後防炸彈。
兩軍後防主將都要坐波監

有睇首回合嘅球迷，都見到烏克蘭踢法係幾機動，翼鋒耶莫蘭高腳法十足十魔術師一樣，被指個名讀音似《驅魔人》入面隻魔鬼Pazuzu嘅蘇素亞亦有「烏克蘭朗尼」之稱，呢兩位仁兄首回合各入一粒，法國冇埋哥斯尼都咪話唔危！

之不過咁，烏克蘭亦有中堅古查同左閘費迪斯基停賽，領隊科文高焗住搵左翼古斯夫客串左閘，防線同法國一樣都係大把漏洞，咁嘅情況，入波又邊會少吖！
Data King

‧法國近4仗有3場開大。

‧雙方近6次交手有5次開半場和。

‧烏克蘭喺今屆外圍賽11戰勁入30球。
乜都玩錦囊

烏克蘭已經連續12場不敗，近8場波亦未試過半場落後，造訪焗攻嘅法國隨時靠突擊搵到食，「和客」有15倍冷冷哋，都博得過嘅。
首回合：法客負0:2