慕遜加柏唔赦史特加

猪拉多纳

兩個死球王鬥入世界波

德甲獨腳戲史特加主場鬥慕遜加柏，焦點係雙方中場命脈對決，慕遜加柏嘅艾蘭高同史特加嘅阿歷山度馬辛都係今屆德甲風雲人物，兩人風格上有好多相似之處，今晚對撼料會擦出火花。

（有線61及201台周六凌晨3時30分直播）

一提起艾蘭高，大家就會諗起世界波，呢位現年33歲嘅慕遜加柏進攻中場，除咗係死球專家外，盤扭技術細膩優雅，射術精湛，甚至喺令人無法想像嘅距離同角度，都隨時入到靚波。

今季艾蘭高為慕遜加柏入咗4個聯賽入球，球球靚到震，堪稱「世界波之王」，ESPN評述員幫佢起咗個綽號叫「加勒比颶風」，佢亦被公認為委內瑞拉歷史上最偉大嘅足球員，上場對紐倫堡半場落後，都係靠佢嘅世界波起死回生，慕遜加柏最終反勝3比1，保持今季主場全勝兼每仗最少贏兩粒之外，亦錄得聯賽三連勝。
加勒比颶風火併西餅先生

至於今季踢到第三輪至得到重用嘅史特加進攻中場阿歷山度馬辛，年紀細艾蘭高十年，但一樣都係技術細膩嘅死球專家，今季同樣為史特加入咗4球，亦經常入靚波，被譽為羅馬尼亞近年罕見嘅優質新星，有線足球評述員劉舜文亦為佢起咗個綽號叫「西餅先生」。佢同艾蘭高嘅分別，在於艾蘭高嘅罰球多數直射，而佢就專斬靚波，今季佢成為德甲死球助攻次數最多球員，仲有佢勤於走動，有別於比較懶散，習慣踢天才波嘅艾蘭高，現時史特加最頭痛嘅係點樣留住佢，皆因包括利物浦在內嘅多家大球會，已經動緊佢腦筋。艾蘭高同阿歷山度馬辛所効力嘅國家隊都無緣世盃決賽周，想睇呢兩粒星，就只有睇德甲了。

講番場波，史特加上仗雖然取得近5輪聯賽嘅首場勝仗，但所贏嘅只係跌晒Watt嘅弗賴堡，賽績同陣上表現都唔叻，相反慕遜加柏除質高一皮外，狀態亦勇得交關，黑柴認為史特加主場都讓唔起平半，撐慕遜加柏下盤。