皇馬士哥騷大反擊

猪拉多纳

C朗畀人窒唔慶就假

今晚西甲艾美利亞主場出戰皇馬，皇馬王牌C朗周中助葡萄牙擊敗瑞典殺入世盃，之後去夜蒲卻畀記者騷擾，搞到成個人躁爆，今仗誓要入多幾粒發洩，整定艾美利亞冇運行，就算今場大細中位數調至3.5球，斯維照撐大盤。

（now 632周日凌晨3時直播）

周中C朗大演帽子戲法，帶領葡萄牙淘汰瑞典趕上世盃尾班車，咁開心梗係要夜蒲輕鬆下喇，當晚佢去到斯德哥爾摩一間夜店嘅門口，咁啱有瑞典記者見到佢，趁機想搵佢做訪問喇，連少少私人空間都畀人煩住，梗係發吓老脾鬧爆記者：「死×開，唔好再跟住我。」全程畀攝影機影晒，對力爭金球獎嘅C朗可能有負面影響。

C朗弗到爆燈，發掘佢嘅前葡萄牙主帥奎雷斯卻乘機翻舊帳：「如果3年前世盃16強C朗係咁有責任心嘅話，我哋已經贏咗西班牙。」當年C朗將輸波責任卸落奎帥度，兩人就擘晒面，奎帥咁樣講擺明係「葡萄」兼抽水。
作客搵艾美利亞祭旗

C朗自尊心重，早前畀白禮達寸唔及美斯，即刻6仗怒轟13粒回敬，依家畀傳媒同恩師夾擊唔慶就假，今晚作客鬥艾美利亞，實數多幾粒證明自己，但皇馬連續6場都有失波，揀讓球客勝唔穩，轉玩入球大仲好。