多蒙特防線淪陷 頂唔住星級拜仁

猪拉多纳

德國打吡 5大守將同時打柴

「傷兵」大戰爆發！多蒙特今晚喺「德國打吡」迎戰拜仁慕尼黑，經過近兩周國際賽期後，兩軍都慘中「FIFA病毒」，夾埋共有16件傷兵，不過比較之下，「蜜蜂軍」成條防線打柴，加埋板凳深度遠不及對手，好難頂得住連後備都粒粒皆星嘅拜仁，拜仁小讓平半，當然捧1.8倍上盤啦！

（有線61、64、201及203、中央5台周日凌晨1:30直播）

原本德國打吡真係萬眾期待，可惜多蒙特同拜仁依家都係傷兵滿營，連德國《慕尼黑日報》都用「十字車」嚟形容佢兩隊，雖然佢哋擺咗個老烏，將冇傷冇病嘅洛賓都擺埋喺架十字車入面，但張設計圖片都幾得意嘅。
中場Kuba 基爾串演後衞

多蒙特上季殺入歐聯決賽，唔少球迷都對佢哋寄予厚望，可惜依家12月都未到，「蜜蜂軍」就好可能要提早告別歐洲舞台，戰績差成咁，傷兵成籮係最主要原因。先唔講長抖嘅根度簡，淨係4個正選後衞比薛斯基、曉姆斯、蘇保迪同舒姆沙全部唔踢得，已經夠晒大鑊，點知連緊急簽返嚟幫手嘅文奴費特列治都傷埋，真係黑仔到爆！

5大守將唔踢得，班二隊後生仔又唔掂，多蒙特教練高普惟有將防中「Kuba」巴拉斯塞高斯基移去右閘，小將哥斯基奧斯就客串左閘，中路仲大鑊，要出動到雪櫃兵柏柏斯達夫普路斯，拍住另一名防中基爾去鎮守，防線4將冇個靠得住，就算陣容較完整嘅前線可以入到1、2粒，相信後面都可以極速輸番轉頭。
拜仁冇列貝利 洛賓頂上

論正選陣容，拜仁未必勁過多蒙特好多，但講到板櫈深度，拜仁就肯定係全歐洲之冠！今仗就算列貝利、謝路美保定、舒韋恩史迪加通通打柴，但都仲有卻奧斯、馬里奧葛斯同洛賓補上，就連多蒙特主帥高普賽前都扯晒白旗：「列貝利係好勁，但今場仲有個好出色嘅球員（洛賓）可以代替佢，咁傷同唔傷都冇分別啦！」拜仁今鋪肯定趁「蜜蜂仔」病，報番季初德超盃嘅輸波之仇啦！