傷兵成籮難大炒 巴塞未回氣小勝「格」

猪拉多纳

今晚西甲早場由巴塞隆拿主場恭候CF格蘭納達，「地上最強」最近飽受傷患困擾，唔少球星早前仲要越洋頻撲為國効力，今次遇上防守硬淨嘅CF格蘭納達，巴塞難大勝。既然今場入球中位數係3.5球，一於撐1.82倍「入球細」。

（now632台周六晚11:00直播）
美斯唔忿人工「低」季尾走人？

巴塞要贏波問題唔大，但話可以大炒對手就難講。事關前鋒美斯、兩閘佐迪艾巴、丹尼爾等人打柴，連中場大腦沙維都話好大機會避戰。其餘主力好似恩尼斯達、尼馬等之前長途跋涉離開歐洲踢熱身賽，一來一回肯定影響狀態。咪忘記嚟緊4個星期佢哋仲要應付8場賽事，相信主帥馬天奴都唔敢踢殘班球員，隨時確保袋足3分就收油。

事實上，CF格蘭納達失球數字只係比巴塞同皇馬多，足見防守有保證。主帥古爾基賓拿賽前承認，冇咗美斯嘅巴塞都好難應付，加上守將美恩斯唔踢得，相信佢哋唔敢冒險搶攻。翻查紀錄，佢哋近4次同巴塞交手，當中3場最多只係失2粒，不妨追多次「入球細」。

講開美斯，《點球點》記者加拉度尋晚爆料，美斯因為唔忿氣尼馬有1,700萬歐元年薪多過佢，巴塞又出爾反爾唔肯加人工，所以好可能响今屆季尾走人。加拉度仲咁話：「佢同另一支球隊有口頭協議，出年2、3月左右就會定去向，美斯會去一個喺西班牙附近嘅地方打波，嗰間球會毫無疑問可以畀到佢1,800萬歐元年薪。」堅唔堅呀？