風調雨順做足工夫搏

猪拉多纳

　　今季有兩個練馬師予人有很大驚喜，一是呂健威，另一個則是文家良。先講呂健威，現已取得十二場頭馬，似乎在馬房人手及運作有所變動後，立即見成效，就連以往少起孖的現象亦有改善，事關呂廐眨眨眼已起了四次孖寶。相信餘下的日子，仍要高度留神呂廐馬。

　　至於文家良馬房，今季曾試過打叠贏的馬有「喜多盈」、「勝利攻略」、「吉利高」、「鑽飾天使」及「大少爺」，淨係這五駒，經已為馬房帶來十W。以文廐目前十四W居於練馬師榜次席走勢看，今季可憑接下來的新血再創佳績。

　　今日文廐有六駒參戰，當然，贏輸要有其他因素配合，但牠們全部都有良佳狀態，縱使不一定有頭馬交出，但仍可作為QT配腳。當中第二場「風調雨順」，更被我認定為進幅甚大之馬，由以往試跑無力無朝氣，到省過一仗後，再接連大閘、單跳、拍閘磨練。在乜都做齊下，馬兒上力程度火速提升，雖然肯操未必一定有好狀態，但此馬的進步卻是一一表露無遺。至於跑法方面，C欄1200米跟前有着數，此駒今季夾正抽到三檔，趁有可觀分頭，呢鋪千祈別錯過。

    (馬會賽事 首席評述員)