國米吸金至上誓搶歐聯位

猪拉多纳

國際米蘭嘅印尼新老闆托希爾入主後滿腹大計，致力擺脫以往「大善人」莫拉堤家族式管理，將「藍黑兵團」更加國際化。首先係開發東南亞及北美市場，從而增加收入，此外托希爾亦希望為國米打造一個現代化、屬於自己嘅新球場，並且加強估波團隊及青訓開支，改變買貴價球星為主、導致負債纍纍要莫拉堤自掏腰包填數嘅困局。
博洛主場慣派「米」

今季國米定下聯賽前三嘅歐聯資格為目標，有得參加歐聯先可確保收入，始終依家球壇冇錢就萬事不行。假如攞唔到歐聯入場券，隨時要賣走漢丹洛域及柏拉斯奧等主力，因此教頭馬沙利一定會叫班手下落多兩錢肉緊。

其實「藍黑兵團」與其他競爭對手如費倫天拿、拿玻里相比冇歐戰負擔，可專心踢好聯賽，今仗作客博洛尼亞，後者不但有亨利基文尼斯等大批傷兵，近六次喺自己地頭對住國米輸咗五次，擺明畀對手食住，客W真係有買趁早。

（TVB 301周一凌晨3時45分直播）