南特有料受讓要得過

猪拉多纳

今晚法甲上演升班球隊大戰，由南特主場迎戰摩納哥！唔好以為暴富嘅客軍有法卡奧呢啲球星就惡晒，南特靠住腳風勁順嘅菲臘佐積域，一樣造出好成績，今晚對住近排作客麻麻嘅摩納哥絕對頂得住，主隊受讓平半當然揀1.88倍下盤啦。

（TVB302台周一凌晨4:00直播）

南特雖然今季先至升上法甲，但係踢起上嚟一啲都唔似係「新丁」，雖然開季戰績麻麻，但佢哋近8場一共獲得6勝1和1負，明顯已經適應甲組嘅節奏。不過最令人驚喜嘅，肯定係塞爾維亞前鋒菲臘佐積域，佢上季喺法乙上陣34次攻入20球，估唔到嚟到法甲都可以保持水準，踢咗13場波已經斬獲8球，只係落後對手嘅王牌法卡奧兩球咋！而且南特近8戰只係失咗3球，防線咁穩陣，摩納哥未必咬得入佢哋。
摩納哥近排啞火

逐個球員秤嘅話，摩納哥嘅水準當然遠超南特啦，可惜佢哋外訪表現極差，已經連續5場作客贏唔到！近3場比賽更係收晒火，夾埋只係得1個入球，齋靠為國際賽疲於奔命嘅法卡奧單天保至尊，睇怕作客不勝走勢要延續落去喇。